.:: Download Myanmar Font (WinKalaw New Version) HERE ::.

Monday, May 12, 2008

Nargis Surveying - 2

နာဂစ်မုန်တိုင်းအပြီး ကယ်ဆယ်ရေးအလုပ်တွေ ဆက်တိုက်လုပ်နေတဲ့ အဖွဲ့ဖြစ်တဲ့ တောကျီးကန်းအဖွဲ့နဲ့ပဲ သာကေတမြို့နယ်က ရပ်ကွက်အချို့ကို မေလ ၁၂ ရက်နေ့မှာ ရောက်ခဲ့ပါတယ်။ လေဘေးသင့် ပြည်သူတွေအတွက် ယင်လုံအိမ်သာ ရှိမရှိ အနေအထားကို သွားရောက်လေ့လာခဲ့တာပါ။ အရင်ဦးဆုံး သာကေတမြို့နယ် မယကရုံးကို အရင်ဝင်ခဲ့ပြီး တာဝန်ရှိသူများနဲ့ တွေ့ဆုံခဲ့ပါတယ်။ လိုအပ်တာတွေ ရှိရင် ဆောင်ရွက်ပေးနိုင်ဖို့ လာရောက်လေ့လာတာ ဖြစ်ကြောင်း တင်ပြပါတယ်။ ရှေ့ရက်တွေတုန်းကလည်း အသိတစ်ယောက်ရဲ့ ကုမ္ပဏီကြီးတစ်ခုက လှူဒါန်းထားတဲ့ ဆန်အိတ် ၅၀၀ နဲ့ ဆီ ၃၆၀ ပိဿာကိုလည်း ဘယ်လို ဝေငှထားကြောင်းကို သိချင်တာလည်း ပါပါတယ်။


မယကအဖွဲ့က မြို့နယ် ဒုဦးစီးမှုးကို လိုအပ်တဲ့နေရာတွေကို လိုက်လံပြသပေးဖို့ကျွန်တော်တို့နဲ့ တစ်ပါတည်း ထည့်လိုက်ပါတယ်။ ဒါနဲ့ လေဘေးသင့် ပြည်သူတွေရဲ့ နေရပ်တွေကို လိုက်လံလေ့လာခဲ့ပါတယ်။ အိမ်သာလိုအပ်ချက်ရှိတဲ့ နေရာ အများစုကတော့ ကျူးကျော်တဲများ ဖြစ်ကြပါတယ်။ ယုဇန ဆောက်လုပ်ရေး၊ တက်လမ်း ဆောက်လုပ်ရေးတို့ရဲ့ ဆောက်လုပ်ရေးစီမံကိန်းများမှာ ၀င်ရောက်လုပ်ကိုင်ခဲ့တဲ့ အလုပ်သမားများရဲ့ ပျံကျ ကျူးကျော်တဲများပါ။ ဆောက်လုပ်ရေး စီမံကိန်းတွေ ပြီးသွားတဲ့အခါမှာလည်း နဂိုနေရာမှာပဲ ဆက်လက် တဲထိုးနေထိုင်ခဲ့တာ ၁၉၉၈ ပါတ်ဝန်းကျင် ကတည်းကပါ။ နာဂစ်မုန်တိုင်းကြောင့်လဲ အဲဒီနေရာလေးရဲ့ အခြေအနေက ပိုမို ဆိုးရွားသွားပါတယ်။ နူရာဝဲစွဲ လဲရာ သူခိုးထောင်းသလိုပါပဲ။


ကျွန်တော်တို့အနေနဲ့ သူတို့အတွက် အိမ်သာဆောက်ပေးဖို့ တတ်နိုင်ပေမယ့် ကျူးကျော်နေရာတွေ ဖြစ်နေတာကြောင့် အချိန်တန်ရင် ပြန်ဖျက်ခံရမှာ ဖြစ်နေပါတယ်။ ရပ်ကွက်က တာဝန်ရှိသူတွေကတော့ အခုလောလောဆယ် မဲပေးပွဲ မတိုင်မှီမှာတော့ ဘာမှ လုပ်ဆောင်မှာ မဟုတ်သေးကြောင်း၊ ဒါပေမယ့် တစ်ချိန်ချိန်မှာတော့ ဒီကျူးကျော်တဲတွေကို ဖျက်သိမ်းမှာ ဖြစ်ကြောင်း၊ တဖြည်းဖြည်း ရှင်းထုတ်သွားမှာ ဖြစ်ကြောင်း ပွင့်ပွင့်လင်းလင်း ရှင်းပြပါတယ်။


အချို့နေရာတွေကျတော့ ဆောက်လုပ်ဖို့ မြေနေရာ မရှိပါဘူး။ တဲတွေနားက ရေကန်လိုဖြစ်နေတဲ့ နေရာမှာပဲ အိမ်သာဆောက်ပေးဖို့ ပြောပါတယ်။ အဲဒီနေရာမှာ လူဦးရေကတော့ အတော်လေးကို ထူထပ်ပါတယ်။ အဲဒီ လူဦးရေအတွက် အိမ်သာကို ရေထဲမှာပဲ ဆောက်၊ လူတွေကလည်း အဲဒီရေပေါ်မှာပဲနေ၊ ဘေးနားကို ကြည့်လိုက်တော့လည်း အမှိုက်ပုံကြီးပဲ ရှိပါတယ်။ အဲဒါမျိုးကျတော့လည်း ကျန်းမာရေးနဲ့ ညီညွတ်မှု မရှိနိုင်ပါဘူး။ အခိုင်အခန့် အိမ်သာတွေ ဆောက်ပေးဖို့ကျတော့လည်း ကျူးကျော်ရပ်ကွက်ဖြစ်နေတော့ ခက်ပြန်ရော။


သာကေတမှာတော့ ရပ်ကွက်လူကြီးတွေ ခေါင်းခဲစရာတွေ ရှိနေပါတယ်။ လေဘေးသင့်ပြည်သူတွေက နီးစပ်ရာ တိုက်ခန်းအလွတ်တွေမှာ အိမ်ရှင်ရဲ့ခွင့်ပြုချက် မရပဲ တံခါးသော့တွေကို ရိုက်ချိုးပြီး ၀င်ရောက်နေထိုင်တာတွေ ရှိပါတယ်။ တိုက်ခန်းတွေရဲ့ လှေခါးခွင်တွေမှာလည်း နေထိုင်ကြပါတယ်။ တိုက်ခန်းပိုင်ရှင် အများစုကတော့ စစ်တပ်က ဗိုလ်မှုးကြီးတွေ ဖြစ်နေလို့ ရပ်ကွက်လူကြီးတွေ ခေါင်းကျိန်းနေပါပြီ။


တချို့ကျတော့လည်း အနားတ၀ိုက်က လူမနေသေးတဲ့ တိုက်အသစ်တွေရဲ့ ခေါင်မိုးတွေပေါ်တက်ပြီး သွပ်တွေကို အချပ်လိုက် ခွာထုတ်ယူပြီး ရောင်းစားတာတွေလည်း ရှိခဲ့ပါတယ်။ မသိရင်တော့ လေမုန်တိုင်း ကျတုန်းကပဲ လေနဲ့အတူ လွင့်သွားသလိုမျိုး ရောင်တော်ပြန်လွှတ်ပြီး ခိုးကြပါတယ်။ အဲဒီလို လုပ်နေတဲ့သူ အများစုက လေဘေးသင့် ပြည်သူတွေ မဟုတ်ပဲ ရပ်ကွက်ထဲက ဖဲသမား၊ အရက်သမားများ ဖြစ်ကြပါတယ်လို့ ရှင်းပြပါတယ်။


အနားတ၀ိုက် တိုက်ခန်းက အိမ်ရှင်တွေက သနားလို့ အိမ်ပေါ်ကို ခေါ်တင်ထားတာမျိုးလည်း ရှိပါတယ်။ အိမ်ပေါ်မှာ နေရာပြည့်သွားတဲ့အတွက် နောက်ထပ် လက်မခံနိုင်တဲ့ လူတွေလည်း လမ်းဘေးမှာပဲ ဖြစ်သလို တဲထိုးနေရတာလည်း ရှိပါတယ်။ ကယ်ဆယ်ရေးစခန်းတွေမှာ နေထိုင်ခွင့်ရတဲ့လူ ရှိသလို နေရာအခက်အခဲကြောင့် အပြင်မှာပဲ နေရတာလည်း ရှိပါတယ်။


ပြဿနာက ကယ်ဆယ်ရေးစခန်း အတွင်းမှာရှိတဲ့ လူတွေကတော့ အလှူရှင်တွေ ထောက်ပံ့တဲ့ ဆန်ဆီ၊ အ၀တ်အထည် စတာတွေကို ရကြပြီး အပြင်မှာ နေတဲ့လူတွေကျတော့ အလှူရှင်တွေအနေနဲ့ မေ့ပြီး မလှူမိတာတွေ ရှိပါတယ်။ ကယ်ဆယ်ရေးစခန်းက မဟုတ်တဲ့အတွက် မပေးနိုင်ဘူးဆိုပြီး ငြင်းလွှတ်တာတွေ ခံကြရပါတယ်။ တချို့ကျတော့လည်း လေဘေးမသင့်ပဲ အချောင်ဝင် တောင်းရမ်းတာတွေ ရှိတတ်တော့ အလှူရှင်တွေကလည်း ပြင်ပက လူဆို မလှူချင်ကြပါဘူး။ အဲဒီမှာ ကယ်ဆယ်ရေးစခန်း တာဝန်ခံတွေကို အပြင်မှာ နေရတဲ့ လေဘေးသင့်တွေက ဓါးကျိမ်း ကျိမ်းပါတော့တယ်ဗျာ။

သြော်... လူ့ဘ၀ရဲ့ သောက... ဝေဒနာတွေကို စုံပလုံစိအောင် ကြားစေရမယ့် နာဂစ်ပါလားဗျာ။ ပန်းဆိုတဲ့ အမည်လေးက သင်းသလောက် ဖျက်ဆီးမှုအားက အတော်ကောင်းလှပါပေတယ်။ ကျွန်တော့် ဘ၀တစ်သက်မှာ အမှတ်တရပါပဲဗျာ။

No comments: