.:: Download Myanmar Font (WinKalaw New Version) HERE ::.

Friday, September 25, 2015

3Ps of Voters

3Ps of Voters တဲ့။ မဲဆန္ဒရှင်တွေဆီက မဲ ၃ မျိုးပေါ့။
1. Protest
2. Pity
3. Passion တဲ့။

နံပါတ် ၁ Protest မျိုးက အစိုးရရဲ့ လုပ်ပုံကိုင်ပုံတွေကို မကျေနပ်လို့ အစိုးရကို ဆန့်ကျင်တဲ့ သဘောအနေနဲ့ အတိုက်အခံပါတီကို ပေးတဲ့ မဲမျိုးတွေ။

နံပါတ် ၂ Pity မျိုးက အတိုက်အခံတွေအပေါ် အစဉ်တစိုက် နှိပ်ကွပ်လာတဲ့ အစိုးရကြောင့် အတိုက်အခံတွေအပေါ် သနားကြင်နာစိတ် ယိုဖိတ်ပြီး ပေးတဲ့ မဲမျိုးတွေ။

နံပါတ် ၃ Passion မျိုးက မဲဆန္ဒရှင်တွေ ကိုယ်တိုင် အတိုက်အခံပါတီအပေါ် ယုံကြည်တယ် မြတ်နိုးတယ် အားကိုးတယ်။ အတိုက်အခံပါတီ အစိုးရဖွဲ့နိုင်ဖို့ကို လိုလားတယ်။ အဲဒါကြောင့် အတိုက်အခံပါတီကို ချစ်တဲ့စိတ်ကို အဓိက အခြေခံပြီး မဲပေးတယ်။

လက်ရှိ မြန်မာနိုင်ငံရေးမှာ NLD ပါတီဟာ နံပါတ် ၁ P ကို အသေအချာ ရထားတယ်။ အစိုးရရဲ့ ညံ့ဖျင်းတဲ့ အုပ်ချုပ်မှုတွေကို စိတ်ကုန်နေတဲ့ လူထုကြီးက NLD ကို နံပါတ် ၁ P အရ မဲပေးလိမ့်မယ်။ ဒီအစိုးရ ပြုတ်ရင် ပြီးရော ဆိုတဲ့ လူက အများသားပဲ။

၁၉၈၈ အရေးတော်ပုံကနေ ၂၀၁၀ နှစ်တွေအလွန်အထိ NLD ပါတီဟာ နည်းမျိုးစုံနဲ့ ဖိနှိပ် ခွဲခြားဆက်ဆံ ခံခဲ့ရတယ်။ NLD ပါတီဝင် အတော်များများ ထောင်တွေကျပြီး သူတို့ရဲ့ မိသားစုတွေ ဘဝတွေ ပျက်ခဲ့ရတယ်။ ဒါကြောင့် လူထုအနေနဲ့ ပါတီအပေါ်မှာ သနားကြင်နာတဲ့ စိတ်ရှိနေနိုင်တယ်။ နံပါတ် ၂ P ကိုလည်း တချို့တဝက် ပိုင်ဆိုင်ထားတယ်လို့ ဆိုနိုင်တယ်။ လက်ရှိ အာဏာရပါတီမှာ အဲဒီလို P ကို ပိုင်ဆိုင်ဖို့ ပါတီတွင်း အကွဲအပြဲတွေ လုပ်ပြထားတာ မြင်နိုင်တယ်။

တကယ် အရေးကြီးဆုံးက နံပါတ် ၃ P ပါ။ NLD ပါတီဆိုတဲ့ စိန်နားကပ်ရောင်နဲ့ ပါးပြောင်နေမယ့်အစား ကိုယ်ပိုင် အလင်းရောင် ထွန်းလင်းနိုင်အောင် အမတ်လောင်းတွေ ပိုမို ကြိုးစားရမယ်။ ကိုယ့်ရွေးချယ်ခံ ဒေသအကျိုး လူထုအကျိုး သယ်ပိုးနိုင်ရမယ်။ တိုင်းပြည်အကျိုးကို အစဉ်တစိုက် ရှေးရှုနိုင်ရမယ်။ ပြည်သူလူထုရဲ့ ယုံကြည်ကိုးစားမှုကို ရယူနိုင်ရမယ်။ အရည်အချင်းရှိ အရည်အသွေး ကောင်းတဲ့ အမတ်လောင်းတွေ ဖြစ်ကြောင်း မှတ်ကျောက်တင်နိုင်ရမယ်။ ပြည်သူချစ်တဲ့ ပြည်သူတွေ မြတ်နိုးတဲ့ အမတ်လောင်းတွေ ဖြစ်အောင် ကြိုးစားရမယ်။

သိထားသလောက် မဲဆန္ဒရှင်တွေ ပေးမယ့် မဲ P ၃ မျိုးပါ။ ကျွန်တော်တို့ အမတ်လောင်းများ အကျိုးရှိစွာ အသုံးချနိုင်ပါစေ။